22/07/2024

Deixamos atrás unha semana marcada polas caídas nos principais índices mundiais. Unha evolución de máis a menos para os índices norteamericanos, onde só o Dow Jones de industriais conseguiu esquivar as perdas semanais tras experimentar máximos históricos no índice a principios da semana. A tecnoloxía seguiu sufrindo o castigo por parte dos operadores e o índice tecnolóxico Nasdaq perdeu un -3,65% na semana. En Europa o castigo foi mesmo máis severo. As bolsas de Francia ou Alemaña foron as máis penalizadas coas maiores dúbidas sobre a economía chinesa e a falta de concreción nas medidas esperadas de estímulo. O agregado EuroStoxx 50 non foi capaz de pechar en positivo nin un só día da semana e despediuse cunha avultada caída do -4,28%.

En efecto, a tecnoloxía foi unha das máis castigadas nesta semana, sobre todo en Europa, a pesar de que ASML presentou uns bos resultados e unha boa carteira de pedidos. O temor dos investidores é que a recrudescencia das restricións ás vendas na China, país ao que están moi expostos os principais valores tecnolóxicos, reduza o potencial de crecemento no sector, e sobre todo no segmento dos semicondutores. Este segmento considérase estratéxico e os EUA temen que a China acelere o seu desenvolvemento tecnolóxico aproveitándose da tecnoloxía estranxeira, malia existiren dúbidas con respecto a cal pode ser a mellor política para frear ese desenvolvemento, porque a China está impulsando con máis forza o seu desenvolvemento interno, ao estar vendo restrinxidas as compras da tecnoloxía máis avanzada no exterior. O problema de Microsoft do pasado venres será tamén unha pedra no camiño da tecnoloxía.

A posibilidade dun novo mandato de Trump na Casa Branca a partir de 2025 gañou puntos, o que favorece o empinamento da curva, que impacta negativamente nas valoracións dos títulos de crecemento, ou a expectativa dunha reedición da guerra comercial, que está impactando nos sectores con máis exposición exterior, tanto nos EUA, polo temor ás represalias ante o incremento de aranceis, como en Europa, que non só teme os potenciais aranceis dos EUA, senón tamén o posible fogo cruzado coa China.

Estas noticias chegan cando xa se iniciara un proceso de rotación desde os valores máis grandes aos máis pequenos e, no inicio desta rotación, as compañías de menor capitalización conseguiran dar certo soporte aos principais índices, pero a intensificación das caídas nos grandes valores e a tecnoloxía levou finalmente o S&P 500 a terreo negativo no computo semanal.

A expectativa dunha boa campaña de resultados ou a previsión de que a Fed poida recortar os tipos dúas veces ata o final do ano poderían estarse tendo xa bastante en conta e dificilmente poderían servir como un gran catalizador, pero si pensamos que poderían servir de soporte ante unha posible prolongación das tomas de beneficios.

Canto ao sentimento do mercado, os niveis de sobrecompra que rexistraba o RSI moderáronse con rapidez no S&P 500 tras as recentes correccións. Durante as últimas xornadas, a forte rotación entre índices e sectores está a producir desordes e movementos no mercado de certa violencia (peches de posicións curtas, apertura de longas), que fixeron repuntar a volatilidade cara aos niveis rexistrados no pasado mes de abril, próximos aos 17 puntos. Neste sentido, pensamos que o proceso de dixestión podería ter certa continuidade no arranque semanal e, a medida que a auga volva ao rego, o mercado comprará as caídas, tal e como leva acontecendo ao longo do ano.