18/09/2023

Durante a semana pasada, o BCE decidiu aumentar a taxa de depósito (canda a taxa principal de refinanciamento e o tipo da facilidade de crédito) en 25 puntos básicos, ata o 4,0%, nunha decisión que foi en contra dunha minoría de membros do Consello de Goberno e da recente deterioración dos datos económicos. Todo apunta a que estamos ante a suba final de tipos por parte do BCE. O cambio no comunicado da institución súmase a esta interpretación. Así, ao dicir que "considera que os tipos de xuro oficiais acadaron niveis que, mantidos durante un período suficientemente longo, contribuirán substancialmente ao retorno oportuno da inflación ao obxectivo", o Consello de Goberno suxire que o foco da política se está desprazando desde o nivel máximo dos tipos ata a duración da restrición monetaria.

Non obstante, a presidenta Lagarde destacou durante a rolda de prensa que tampouco se pode excluír un escenario de novas subas de tipos. Non parece probable que os prezos do petróleo, por si mesmos, poidan provocar máis aumentos de taxas, aínda que se os maiores prezos da enerxía se combinasen cunha mellora do crecemento e unha repunta salarial significativa, as preocupacións sobre posibles efectos de segunda rolda e as expectativas de inflación poderían aumentar entre os membros do BCE. Polo tanto, non podemos asegurar aínda que esteamos ante o final do ciclo de axuste do Banco Central Europeo.

Nos Estados Unidos, os datos publicados durante a semana pasada continuaron sendo sólidos. Deste xeito, tanto as vendas polo miúdo coma a produción industrial do mes de agosto, mantiveron unha sorprendente resistencia. No mundo dos prezos, o IPC de agosto mostrou unha aceleración xeneralizada en taxa xeral e algo máis modesto na subxacente. No referente ao IPC xeral, a lectura demostra os riscos inflacionistas que presentan os maiores prezos do petróleo, que axudou a elevar o crecemento da inflación ata o 3,7% interanual, desde o 3,2% do mes anterior. Por outra banda, os detalles do IPC subxacente suxiren que o descenso da inflación está avanzando a un ritmo máis gradual e menos xeneralizado do que indicaran os datos de xuño e xullo.

Como reaccionará a Reserva Federal? Unha pausa na reunión do mércores parece case segura, polo que a atención do mercado centrarase no famoso "gráfico de puntos", que indicará se os membros do FOMC seguen apostando por unha nova suba de tipos entre as reunións de novembro e decembro. Xa que as presións inflacionistas seguen sendo elevadas en relación coas normas prepandémicas e que a actividade e as condicións do mercado laboral se manteñen favorables, é probable que se siga sinalando unha última suba de tipos de 25 puntos básicos, seguida dunha prolongada pausa que se mantería, polo menos, durante a primeira metade do ano 2024.

Doutra banda, os avances rexistrados pola economía chinesa parecen avalar a posibilidade de que a actividade económica "fixese chan" no xigante asiático. Neste sentido, a inflación interanual volveu a territorio positivo e as vendas polo miúdo e a produción industrial melloraron as lecturas do mes pasado e as expectativas dos analistas. De maneira similar, o financiamento total e os novos préstamos bancarios foron mellores do previsto. As caídas no investimento inmobiliario e as vendas de propiedades tamén se moderaron lixeiramente. Esta mellora na actividade reflicte as numerosas medidas de flexibilización do goberno, incluídas a maior emisión de bonos gobernamentais e as reducións do coeficiente de reservas esixidas á banca polo Banco Popular da China. Nas últimas semanas, tamén se anunciaron medidas de estímulo dirixidas ao sector inmobiliario, como os recortes dos tipos hipotecarios sobre préstamos para primeira vivenda existentes, a flexibilización das normas de pagamento hipotecario ou a redución do pagamento inicial para os que acceden por primeira vez ao mercado da vivenda. Se durante as próximas semanas se segue apuntando nesta dirección de recuperación económica na China, serán moi boas noticias para a economía europea e para o crecemento económico global, aínda que tamén se poderían incrementar as presións sobre os prezos enerxéticos e a inflación.