04/11/2024

As eleccións estadounidenses sempre son relevantes para a economía global, dado o papel hexemónico dos Estados Unidos, aínda que nesta ocasión poderiamos dicir que a importancia relativa destas eleccións excede sobradamente os padróns históricos, xa que suscita riscos significativos respecto do modelo de funcionamento económico mundial das últimas décadas.

En particular, algunhas das propostas económicas do candidato Donald Trump poderían afectar profundamente ás bases do comercio internacional. Por exemplo, impor aranceis do 60% a todas as importacións de produtos chineses e do 10% ás do resto de mundo, como prometeu durante a campaña, faría que a taxa arancelaria media dos Estados Unidos volvese ao nivel de 1935. Se se implanta plenamente, e tendo en conta as probables represalias das contrapartes respecto das exportacións americanas, podería afectar dramaticamente aos fluxos globais de comercio e investimento.

Por outra parte, as propostas de política fiscal de Trump exacerbarían os problemas fiscais dos Estados Unidos en maior medida que as de Harris. Dito isto, existe unha gran controversia respecto do grao de implantación real destas propostas, que dependerán do control republicano das cámaras, das reaccións do resto de mundo e do enfoque político que termine priorizando Trump, se finalmente accede á Casa Branca.

Neste sentido, non son poucos os analistas que suxiren que o verdadeiro obxectivo de Trump coa súa ameaza arancelaria é crear unha base sólida de negociación co resto do mundo, para obrigar os socios comerciais a comprar máis produtos norteamericanos e negociar un mellor acordo para os Estados Unidos, sen que no seu ánimo estea provocar unha guerra comercial a grande escala. Quen sabe?

En todo caso, sexa unha cousa ou a outra, a incerteza será relevante mesmo despois do proceso electoral, pois é posible que non teñamos os resultados finais ata dentro de varios días ou incluso varias semanas. Se Trump ou Harris logran unha vitoria incontestable, os resultados faranse oficiais o día 6, pero se unha das partes impugna os resultados, a incerteza podería estenderse ata o mes de decembro.

As enquisas mostran que a campaña está nun absoluto empate técnico e que a vantaxe que collera Trump nos últimos días desapareceu en boa medida durante a última semana. Percíbese que unha vitoria de Trump con control republicano de ambas as cámaras tería un efecto inicialmente positivo sobre a actividade económica estadounidense, aínda que os riscos comerciais e fiscais tamén aumentarían, como xa vimos.

Do mesmo xeito, un novo mandato de Trump facilitaría un proceso de desregulación que sería inicialmente benvido por moitos sectores económicos, entre os que destacariamos o bancario e o petrolífero. Por outro lado, as pequenas empresas beneficiaríanse dun escenario de maior actividade doméstica, mentres que as grandes empresas, máis expostas ao comercio internacional, poderían acusar as maiores incertezas arancelarias.

A pesar da igualdade que mostran as enquisas, os mercados posicionáronse claramente para unha vitoria de Trump. Isto é evidente na suba de prezo que experimentaron multitude de estratexias e clases de activo que se beneficiarían dunha vitoria republicana. Desta forma, revalorizáronse as bolsas en detrimento da renda fixa, aumentou a cotización do dólar, as accións estadounidenses tiveron un mellor comportamento relativo fronte ás europeas, as pequenas empresas fronte ás grandes, os sectores cíclicos fronte aos defensivos, as accións dos bancos subiron con claridade e, do mesmo modo, a expectativa de vitoria electoral do expresidente, un partidario declarado da industria das criptomoedas, tamén provocou a repunta da cotización do bitcoin.

É dicir, os mercados cren firmemente nunha vitoria de Trump, pero as enquisas dinnos que a elección non pode estar máis disputada. Isto xéranos un risco asimétrico para a semana actual. En caso de vitoria de Harris, é moi probable que se produza unha importante corrección nalgunhas destas operacións e que os mercados experimenten unha significativa repunta da volatilidade.