16/09/2024

O vindeiro mércores 18 de setembro, a Reserva Federal iniciará o seu ciclo de baixadas de tipos de xuro. Dado que xa é un feito que teremos un recorte de tipos, a única incógnita é coñecer o tamaño da baixada inicial, que podería ser tanto do 0,25% como do 0,50%. As comunicacións dos distintos participantes e as informacións aparecidas en prensa suxiren que os membros do Fed están divididos respecto da magnitude da baixada.

Non obstante, parece algo máis probable un movemento inicial do 0,25%, sobre todo se temos en conta as lixeiras sorpresas á alza nos datos de inflación do mes de agosto.

Do mesmo xeito, os discursos dos membros da Reserva Federal dos últimos días non deixaron entrever, en xeral, ningunha urxencia por un recorte maior. Porén, segundo informes recentes publicados nalgúns xornais financeiros, os membros da Reserva Federal aínda non decidiron a magnitude do recorte e, nestes momentos, as probabilidades dunha baixada do 0,5% sitúanse nun nada desprezable 43%, despois de que practicamente fose descartado un movemento tan grande tras a publicación dos datos de inflación de agosto.

En definitiva, pode pasar calquera cousa. Ademais, temos que ter en conta un segundo factor de incerteza, ao descoñecer cal será a reacción dos mercados ante a decisión da Reserva Federal, que podería ser moi positiva, pero tamén moi negativa.

Por exemplo, se os investidores interpretan que un movemento á baixa de 50 puntos básicos responde a un desexo da Reserva Federal de non quedar por detrás do mercado e de acometer con firmeza o proceso de flexibilización monetaria, a reacción será positiva con gran probabilidade. Pola contra, se os investidores intúen que detrás desta decisión se agocha unha urxencia por baixar tipos motivados por unha desaceleración económica maior da prevista, a corrección sería inevitable.

Do mesmo xeito, unha baixada de 25 puntos básicos podería ser interpretada tanto positiva coma negativamente. Dunha parte, o mercado podería interpretar que a Reserva Federal non está preocupada polo crecemento económico e que non ve a necesidade dun proceso rápido de baixada de tipos, pero tamén podería alimentarse o temor de que o Fed non sexa capaz de moderar a restrición monetaria antes de que a economía esvare pola pendente da recesión.

Como vemos, calquera escenario é posible de cara á reunión da Fed e cremos que ten pouco sentido intentar anticipar un resultado. Dito isto, é evidente que o mercado quere seguir subindo, como o demostra a rapidez das recuperacións bolsistas en agosto e setembro. Se se cumpre o noso escenario base de aterraxe económica suave, cremos que os prezos dos activos financeiros se manterán correctamente soportados na parte final do ano, que podería ser especialmente favorable para os investidores máis conservadores.