29/07/2024

Deixamos atrás unha semana bastante mixta para as bolsas mundiais, en que os índices norteamericanos evolucionaron con maior debilidade fronte aos do Vello Continente. En efecto, Wall Street non foi capaz de sobreporse a unha semana ateigada de resultados empresariais. En determinados casos, frustrantes e que complicaron a vida a uns títulos que cotizan cunhas valoracións esixentes. Da mesma maneira, parece que o característico padrón estacional de repuntas de volatilidade xa chegou. Nas últimas 3 sesións da semana pasada, o índice VIX repuntou máis dun 20% ata niveis superiores aos 18 puntos. A rotación sectorial en curso e un fluxo de noticias menos construtivo respecto á campaña de resultados empresariais están servindo para que os operadores afinen os prezos das opcións.

Volveu ser noticia a caída das grandes tecnolóxicas durante a semana, lastradas polo empinamento da curva nos EUA e tamén por algúns resultados empresariais que foron mal recibidos en Wall Street, como os de Alphabet ou Tesla. A semana que comeza vai estar tamén marcada por importantes resultados empresariais das grandes, e é moi probable que mostren aínda fortaleza, aínda que as altas expectativas xeradas nos últimos meses poderían ser o seu principal talón de Aquiles.

As caídas no sector da tecnoloxía, incluída Nvidia, producíronse a pesar das noticias que apuntan a que a compañía podería evitar unha vez máis as novas restricións impostas pola Administración nos EUA para a venda de produtos á China. Outro dos valores que descendeu con forza na semana foi TSMC, que se viu arrastrado polo comportamento do sector da tecnoloxía a nivel global e tamén polo impacto do tifón Gaemi, que mantivo a bolsa de Taipei dous días pechada.

Canto á campaña de presentación de resultados empresariais nos Estados Unidos, ata agora publicaron pouco máis do 30% das compañías do S&P 500, e a porcentaxe de sorpresas positivas mantense por riba da media histórica no BPA (74,2% fronte a 73,3% de media) e moi por debaixo da media histórica en ingresos (46,2% fronte a 54,2% de media). O consenso está estimando agora un incremento do BPA do 10,5% a/a, 1 p.p. máis do que se estimaba ao inicio da campaña. Porén, a acollida dos resultados non está a ser moi positiva, pola decepción en resultados relevantes entre as grandes tecnolóxicas e tamén no consumo. As decepcións nos resultados de Alphabet ou Tesla contribuíron á caída do sector tecnolóxico, que na semana entrante vai estar pendente de resultados moi relevantes, como os de AMD e Microsoft, Meta, Apple, Intel e Amazon. Meta tamén podería ser protagonista durante a semana, ao enfrontarse á súa primeira multa na UE, que acusa a compañía de abuso de posición dominante no mercado de anuncios clasificados ao vincular Facebook Marketplace á súa rede social.

Tesla superou as expectativas en ingresos e mellorou no interanual os datos do segundo trimestre de 2023, aínda que o beneficio caeu un 45% e a marxe de beneficios pasou do 11% que rexistrou no segundo trimestre de 2023 ao 5,8% no segundo trimestre de 2024 e ningunha das dúas figuras alcanzou as expectativas dos analistas. Ademais, Tesla atrasou a presentación do Robotaxi a outubro. Pola súa parte, Alphabet sorprendeu á alza cos seus resultados, cun incremento no beneficio neto do 28,6% a/a grazas, fundamentalmente, ao seu negocio na nube e ao incremento dos ingresos en publicidade do 11%. No entanto, os resultados de Alphabet foron recollidos con preocupación, porque os ingresos do negocio na nube decepcionaron e mostraron debilidade fronte aos seus competidores (os principais son Microsoft e Amazon). Alphabet, ademais, pediu paciencia aos investidores para que os seus investimentos en IA teñan máis impacto positivo nas súas contas.

O sector do consumo tamén trouxo algunhas decepcións que, porén, se están compensando en boa parte pola expectativa de próximos recortes de tipos por parte da Fed e por algúns datos económicos que seguen mostrando resiliencia. Destacaron as decepcións en Visa, Whirpool, Pool Corporation, American Airlines, que recortou o seu "guidance", ou Ford Motor, que sufriu tras presentar uns resultados peores do esperado, que achacou ao aumento dos custos de reparación en garantía. En sentido positivo tamén destacaron algunhas compañías, como Harley-Davidson ou IBM, que rexistrou unha melloría no negocio de IA.

Con respecto á campaña de presentación de resultados empresariais do Vello Continente, publicaron ata o momento pouco menos do 20% das compañías do EuroStoxx e a porcentaxe de sorpresas positivas colócase por debaixo da media histórica no BPA (47,4% fronte a 56,6% de media) e en ingresos (40,4% fronte a 52,1% de media). O consenso está estimando agora un incremento do BPA do 15,95% a/a, 1 p.p. máis do que se estimaba ao inicio da campaña. Este é o incremento interanual máis alto desde o terceiro trimestre de 2022 e a primeira variación positiva desde o primeiro trimestre de 2023.

No que levamos de campaña, destacaron as sorpresas negativas no sector do luxo (LVMH ou Kering, que anunciou un "profit warning"), que é ademais un dos máis castigados nos últimos meses, pola moderación do crecemento económico na China e polo temor a resultar danado nunha guerra comercial. Nestlé recortou as súas perspectivas de vendas para o ano, con dificultades para compensar os menores aumentos de prezos con maiores volumes. Stellantis tamén caeu ao se afundiren os seus beneficios no primeiro semestre. Nesta mesma liña, destacou en negativo Mercedes-Benz Group, ao caeren bruscamente as vendas de vehículos eléctricos e debilitarse a demanda na China.

No sector da tecnoloxía e dos semicondutores, lastrado en parte polas malas noticias procedentes dos EUA, destacou en negativo tamén BE Semiconductor Industries, que anunciou que os pedidos do segundo trimestre estiveron por debaixo do que estimaban os analistas.

En sentido positivo destacaron Roche Holding, que subiu ao elevar a súa previsión de beneficios para 2024, con novos fármacos como Vabysmo para doenzas oculares, o que impulsou os ingresos do último trimestre e do primeiro semestre do ano, ou Sanofi, que tamén subiu ao elevar a súa previsión de beneficios para o ano.

A curto prazo, a clave para a evolución dos mercados e para a renda variable en particular seguirá estando no sector da tecnoloxía, que despois de acumular un comportamento moi positivo podería seguir dixerindo os fortes avances anuais ante a importante rotación sectorial en curso e unhas valoracións moi elevadas. Veremos ata que punto os operadores axustan as súas expectativas no curto prazo. En calquera caso, o escenario continúa a ser favorable tanto para a renda fixa como para a renda variable: a pesar de que determinados resultados non satisfixeron os investidores, debemos lembrar que os crecementos de beneficios en agregado son robustos. A flexibilización das políticas monetarias actuará como un importante catalizador a medio prazo, nun contexto de axuste suave do crecemento económico.

Mantemos, polo tanto, o noso posicionamento construtivo sen cambios unha semana máis, coa expectativa de que se seguirá despregando o noso escenario de aterraxe económica suave, que favorecerá a boa evolución dos prezos tanto da renda variable como, sobre todo, da renda fixa.