30/09/2024

O optimismo investidor deu un paso de xigante na semana pasada, ao irromper China cun amplo paquete de estímulos que cambiou completamente a dinámica do mercado, sobre todo no que respecta ás bolsas asiáticas e europeas. O paquete anunciado non só inclúe medidas para apoiar un sector inmobiliario moi castigado, tamén se anunciaron medidas de índole fiscal para axudar os consumidores, aínda que faltan detalles para poder valoralas axeitadamente.

Aínda que non son poucos os analistas que consideran que o paquete de medidas anunciado podería ser insuficiente, é evidente que os esforzos concertados das autoridades durante a semana pasada indican que A China comeza a tomar en serio a resolución dos seus problemas estruturais, e que os dirixentes do país non pasan por alto a urxencia dunha resposta política.

Polo tanto, a clave non reside tanto no que A China anunciou, senón no que poida vir a continuación. Nesta fronte, distintas informacións apuntan á crecente posibilidade de que se aprobe unha emisión extraordinaria de débeda, que se podería destinar a medidas para estimular o consumo e outras para apoiar os gobernos locais. Estas medidas, obviamente, poderían ter importantes efectos sobre o crecemento do país en 2025.

Outros dous factores impulsaron a euforia investidora ao longo da semana pasada. Dunha parte, os datos macroeconómicos publicados nos Estados Unidos seguiron reforzando a narrativa de aterraxe económica suave, ao non se apreciar sinais que apunten a unha contracción brusca da actividade económica.

O outro impulsor do optimismo chegou coa presentación de resultados por parte da empresa Micron Technology, que superou amplamente as expectativas de consenso e ofreceu unhas previsións de ingresos e beneficios que permitiron recuperar a confianza investidora na demanda de chips relacionada coa intelixencia artificial.

Así as cousas, o movemento de apetito polo risco estendeuse por multitude de clases de activo e beneficiou as bolsas mundiais, as materias primas (incluído o ouro), o crédito corporativo, os sectores cíclicos ou as criptodivisas. Case todos os activos financeiros participaron da festa.

Nos mercados emerxentes, a bolsa chinesa pechou a súa mellor semana desde o ano 2008 e os seus índices máis representativos subiron nada menos que un 25% en tan só cinco sesións. Os mercados emerxentes asiáticos terminaron a semana con alzas superiores ao 9%, mentres que as bolsas latinoamericanas tamén se beneficiaron da forte repunta nos prezos das materias primas.

Porén, a intensa recuperación das últimas semanas deixou moitos índices en zona de sobrecompra técnica, moi evidente no caso dos mercados asiáticos, o que supón tamén unha chamada á cautela.

A curto prazo, enfrontámonos a tres riscos que poderían obstaculizar a traxectoria dos mercados bolsistas mundiais. O primeiro ten que ver cunhas eleccións presidenciais americanas que están a algo máis dun mes de distancia e que son especialmente incertas. O risco político, polo tanto, manterase en niveis moi elevados nas próximas semanas.

O risco xeopolítico tamén se intensificou en Oriente Próximo e, tras a morte do líder de Hezbollah a mans de Israel, non é en absoluto descartable unha escalada adicional do conflito. Por último, os datos macroeconómicos son volátiles por natureza e calquera publicación que debilite a narrativa da aterraxe económica suave tamén terá implicacións negativas para os mercados, como vimos nos primeiros días dos meses de agosto e setembro.

Dito isto, seguimos convencidos de que a Fed terá éxito no seu mandato dual e manterá a estabilidade dos prezos e a actividade económica nos Estados Unidos. Isto implica que calquera retroceso nos prezos das accións será interpretado como oportunidade de compra polos investidores e que, a medio prazo, a tendencia alcista da renda variable poderá continuar.