2024/08/12

Aholku hori, zalantzarik gabe gure seme-alabei ere emango geniekeena elikagai ultraprozesatuen kontsumoak epe luzera osasunean eragiten dituen ondorio kaltegarriez jabetzen garenean, guztiz aplikagarria izan daiteke inbertsioaren munduan.

Gaur egun, informazio uholde baten mende gaude, hainbat eta hainbat hedabidetatik iristen zaiguna, eta, gehienbat, inbertsiorako zabor-janaria besterik ez da. Janari mota hori kontsumitzeak gure ondareari buruzko erabakiak hartzera garamatza, epe laburrean ondo sentiarazten gaituztenak, baina gure finantza-osasuna epe luzera zigortzearen kontura. 

Kontakizunek gidatzen dute merkatuen portaera, eta horietako ehunka jasotzen ditugu egunero: burtsak igotzeko edo jaisteko arrazoiak, azken gertaera makroekonomikoak, arazo geopolitikoak edo hamaika arrazoi sinesgarri, sektore edo enpresa jakin baten aldeko apustua egitera bultzatzen gaituztenak.

Komunikazio horiek guztiek zabor-janariaren antz harrigarria dute: kontsumitu egiten ditugu soluzio azkar bat eskaintzen dutelako eta beti azken berrien jakinean egotea ahalbidetzen digutelako. Gertakariek abiadura bizian eboluzionatzen badute, zergatik ez du nire diru-zorroak gauza bera egin behar?

Gainera, nonahi daude. Supermerkatu batean egotea bezalakoa da, pastel, gozo eta izozki ilara eta ilarak dituena eta frutak eta barazkiak, aldiz, bazter batean ezkutatuta. Horrelako ingurune batean erabaki adimentsuak hartzea oso zaila da.

Horrelako informazioen sortzaileak bultzatzen dituzten pizgarriak aztertzen baditugu, inbertsioari buruzko zabor-janaria bi arrazoi hauengatik sortzen dela konturatuko gara: finantza-aktiboen erosketen eta salmenten bolumena handitzeko, ala inbertitzailearen arreta erakartzeko trafiko handia sortzen duten kazetaritza-artikuluen bidez. Motibazio nagusia ez da izaten epe luzerako gure finantza-osasuna hobetzea, baizik eta gure joera mentalei etekina ateratzea.

Opil industrialak oso noizbehinka jatea ez litzateke arazo larria izan behar gure osasunerako epe luzean, baina inbertsio-akatsen baturak, itxuraz txikiak hasiera batean, kostu izugarria ekar dezakete epe luzera. Horrela, alferrikako komunikazio-uholde hori garrantzitsua da, eta kaltegabea izatetik urrun dago. Beti dago istorio berri bat kontatzeko eta saltzeko.

Zabor-janariaren fluxu hori neutralizatzeko, epe luzera funtzionatzen duela dakigunari erreparatu behar zaio: aktiboen banaketa egonkorra izatea, gure helburuekin bat datorrena, eta gure zorroko posizioak etengabe ez aldatzea. Hau da, frutak eta barazkiak kontsumitzeari eman behar diogu lehentasuna. Jakina, ez dira hanburgesa on bat bezain gustagarriak, baina etorkizunean osasun hobea bermatzen digute.

Azken batean, erakusleiho batean erakusgai dauden pastelekin askotan egiten dugun moduan, begiratu egin ditzakegu, baina ez jan, ezohiko kasu batzuetan izan ezik.